ადვოკატმა ანა აბრამიშვილმა რადიო „პალიტრას“ გადაცემაში „თქვენი დრო“, მშენებარე კორპუსში ბინის შეძენის დროს გასათვალისწინებელ საკითხებზე ისაუბრა და ის პროცედურები განმარტა, რომელთა გავლაც აუცილებელია მომავალში პრობლემების თავიდან ასაცილებლად.
მისი თქმით, პირველ ეტაპზე, მყიდველმა უნდა გადაამოწმოს მიწის საკუთრების მდგომარეობა და ის ვალდებულებები, რომელთა შესრულების პირობითაც გახდა მშენებელი მისი მესაკუთრე.
„აუცილებელია საჯარო რეესტრში შევამოწმოთ, ვისი საკუთრებაა უძრავი ქონება, ე.წ. მიწა. ჯერ ვამოწმებთ პირველ ამონაწერს, მანამდე, სანამ მშენებლის საკუთრებაში გადავა უძრავი ქონება. საინტერესოა ის, მანამდე ვინმეს ხომ არ ეკუთვნოდა და რაიმე ვალდებულებით ხომ არის გადაცემული მშენებლისთვის.ხშირია შემთხვევები, რომ მაგალითად, ან აღნაგობის ხელშეკრულება იდება, ან ნასყიდობა ვალდებულებით იდება. ასეთი ხელშეკრულებები იდება უშუალოდ პირველ მესაკუთრესა და მშენებელს შორის, სადაც მესაკუთრის სტატუსს იძენს მერე უკვე მშენებელი. ამას მნიშვნელობა აქვს გაყიდვის ნაწილში.
უნდა ვიცოდეთ, ხომ არ აქვს რაიმე შეზღუდვა, მშენებელს. ეს ინფორმაცია საჯაროა და შესაძლებელია მათი არქივიდან გამოთხოვა. ეს საჭიროა იმისთვის, რომ გვქონდეს ინფორმაცია, რამდენი აქვს ვადა მშენებელს სხვადასხვა ვალდებულების შესასრულებლად და შეძლებს თუ არა ის მშენებლობის დასრულებას ჩვენთან შეთანხმებულ ვადაში.ხშირად ასე ხდება რომ, გვიან იწყებენ მშენებლობას, რადგან მხარეებს შორის ვერ ხდება დროულად შეთანხმება და ეს ვადა უბრალოდ გადის. ეს არის ერთ-ერთი მიზეზი, რის გამოც მშენებელს შეუძლია მიმართოს მერიას და გააგრძელებინოს მშენებლობის ვადა. ასევე მშენებლობის ვადის გახანგრძლივება ხდება მაშინაც, როდესაც მშენებელი დაიმატებს გარკვეულ ფართობს და ხდება ცვლილება. ეს ყველაფერი მნიშვნელოვანია იმისთვის, რომ ხშირად ყიდულობენ ბინას, ჰგონიათ, რომ პროექტი არსებობს და ამ დროს არ არის. ეს პრობლემები წინ რომ არ გადაგვღობოს, ჯობია, რომ თავიდანვე გადავამოწმოთ ინფორმაცია tass.ge-ზე“, – აღნიშნა იურისტმა.
ასევე გასათვალისწინებელი და გასარკვევია, რა რესურსით შენდება კორპუსი. ამ საკითხში ყველაზე უსაფრთხო საბანკო გარანტიით მშენებლობაა, რადგან ბანკი იძლევა იმის გარანტიას, რომ მშენებლობა აუცილებლად დასრულდება.
„მეორე ეტაპზე, აუცილებელია გავარკვიოთ, რა რესურსით აშენებს მშენებელი კორპუსს. ამის გარკვევა შესაძლებელია იმ შემთხვევაში, თუ კორპუსი საბანკო გარანტიით შენდება. ეს დამალული ინფორმაცია არ არის და თვითონ მშენებელი სიამაყით ამბობს ხოლმე რომ საბანკო გარანტიით მოხდება მშენებლობა. ყველაზე უსაფრთხოა, როდესაც მშენებლობა საბანკო გარანტიით ხდება. ეს მართლაც არის გარანტია, რომ მშენებლობა აუცილებლად დასრულდება.
ასევე, როცა ბინის შეძენის მსურველს წინასწარ გადახდილი აქვს მაგალითად 50% და აღარ აქვს კომპანიის ნდობა, რადგან პროექტი რამდენჯერმე გაჩერდა, ბანკი უკან მიბრუნებს გადახდილ თანხას. მყიდველს აღარ უწევს სასამართლოში წასვლა და გრძელვადიანი დავა, იმისთვის, რომ ეს თანხა დაიბრუნოს“,- განმარტა ანა აბრამიშვილმა.
მისივე თქმით, ბინის ნასყიდობის წინმსწრები ან ძირითადი ხელშეკრულება აუცილებელია გაფორმდეს საჯარო რეესტრში – ვალდებულებით.
„მესამე ეტაპია, გასაფორმებელი ხელშეკრულება მყიდველსა და მშენებელს შორის. იქნება ეს წინსწრებით გაფორმებული ხელშეკრულება თუ ძირითადი, აუცილებელია ყველა პუნქტი გაიწეროს დეტალურად, ასევე განისაზღვროს პირგასამტეხლო ვადის დარღვევისთვის
ასეთი ხელშეკრულებები ძირითადად ნოტარიუსებთან ფორმდება, რასაც იურისტები არ მივესალმებით. ნოტარიუსი უბრალოდ ამოწმებს პიროვნებების ხელმოწერებს და არ ეხება ხელშეკრულების პირობებს. ამიტომ ვურჩევ მყიდველებს ხელშეკრულება საჯარო რეესტრში გააფორმონ, ვალდებულებით. ეს იმას ნიშნავს, რომ რამდენჯერაც უნდა შეიცვალოს მიწის მესაკუთრე, მას გადაჰყვება ვალდებულება“,- განაცხადა ანა აბრამიშვილმა.
